هوارا: رد على موضوع جار القمر موضوع الحضارة

[nancy]

على هور يا بو الهورا
شو سر هيدا النشاط هل اليومين؟
هيك فجأة دبت فيك الحرارة

انطرحت مواضيع كانت
أكثر بكثير فيها مولعة النارة
مالقينالك فيها رد
ولا عبرتها بأي عبارة

هلأ بتعزم الناس, تعوا ردوا يا خلان
هيدا موضوع مهم, موضوع عن الحضارة
مع هيك رايحين نرد و من هون
برافو عليك, تعبان بالموضوع و كاتبه بجدارة

أي يا عمي شو هيدي الناس
حقد و طمع , و حكياتها مليانة قسوة و مرارة
بتستنى فرصة لتضرب سكاكين
تتبلى و تؤل ماواويل من دون
ذمة او ضمير و لسان بعيد عنك مثل الشرارة
و ان شافو واحد و اثق من حالو و ما لقيو فيه عيب
قالوا يا ورد ليه خدودك ضاربة حمارة؟ (يعني لون أحمر)

و الكل صاير فهمان و بيحكي بكل من
فن و طب و سياسة و تجارة
بس بتضلها احلى و أمتع سيرة
هي سيرة البنات العذارى
لارا و سارة و تمارا
حرام و الله حرام! في جنة و نار
لك شو كل هل الجسارة؟

و أنت يلي بتشور ع الناس هيدا غلط و هيدا تمام
قلي من فضلك مين عينك و حطك مختار للمشورة؟

روح داوي قصر النظر عندك
شي سمك سنتيمن نضارة

لك حاجة بتمشي و بتنفخ قدامك بالزمار
مش كل من صار عندو قرشين
لبس طقم و كرافيه و حمل سيكار
بيطلعلو يحكي, عمرها العين ما عليت ع الحاجب



يا ناس يا هو مش هيك ابدا الحضارة
علم و وشم و صليب
و كل يوم لوج الصبح على سبعة ونص
طرنيب, بوراكو و تركس

و على بوي فريند و كيرل فريند
هيدا عصر الديمقراطية, هيك بدنا نعيش الحرية
يا عالم دينا محبة مش قيود
و كتابنا على جبل عالي للناس منارة
ليه مش مقدرين هل الدين الدرة و الجوهرة؟

يلا هاتو لنشوف شمروا الزنود
و تعوا نعيد من خلال هيدا الموقع مجد الحضارة
يلي بنوها اجدادنا بسواعدهم السمارا
صاير عنا و طن, صحي مش على أرض
هو اون لاين بس أحسن من بلا
يلا تخلوا عن هل الأنانية تأشوف
و خلي يفرجينا كل واحد شو عندو من مهارة
أحسن ما يجي يوم, نندم و نقول
و ينك يا جزيرة كوم
ضيعانك يا خسارة!

و أخيرا, بتمنى يا جار القمر تتقبل
نقدي الك بالبداية بكل سعة رحب و صدارة
وما تزعل مني مش هيك على رأيك بتكون الحضارة؟
أنا انتقدتك و كل واحد مقصر
بس طقت براسك و عجبني استخدم اسلوبك
ما بعرف كيف كررررت معي هل الهورا
بس بلا كيف؟ شو رأيك بهل الشطارة
بعرف أكتب هوارا؟

Nancy 2

[Abo George]

الله الله أي والله راحت عليك ياجار القمر
قال نانسي بتقول ::: ما بعرف كيف كررررت معي هل الهوارة
انا بشوف انتِ بتكتبي أحلى هوارة
وارحت عليك يا جار
حتى لو مسكت أحلى قلم
وبالقمر كتبت أحلى هوارة
عم نستنا ردك يا جار ياااااااااااهوارا
أذا ما طلع معك شي بالهوارة
سلامات وتحية نانسي 2

[جار القمر]

اول شي شكرا الك نانسي لو رديت علينا بمسبة وحياتك انا ما بزعل من كلمة حق
لما بيكون عندك حق
لا تشوفي النص الفاضي من الكاسة شوفي النص المعبا لانو قصير النظر يلي بيشوف النص الفاضي وحقد اكيدة ما عندي وسكاكين لاضرب فيها مو عادتي
بالنسبة للمواضيع لما اكتب اي نقد او اي موضوع يا نانسي بشمل حالي ما بحكي بلسان
ما قلتلك هل انتم انا س حضاريين كتبتلك هل نحنو شعب حضاري يعني عم اشمل حالي مع الكل
بالنسبة للمواضيع انا برد عل مواضيع يلي بحس انو خرج ينرد عليها او ضمن اهتماماتي وما بفتكر اني مقصر ما تشوفي الكم شوفي النوع نانسي شوفيه ردودي وبعدين قليلي انو انا مقصر انا مقل بكتاباتي لاني ماني اديب ولا شاعر بس شوفي ردودي وطبيعة الكتابات وقليلي اذا ها الردود وها الكتابات هيي فاضية او بتعبر ع حقد متل ما تفضلتي
بالنسبة لاصلي حضرتك ما بتعرفي عن جار القمر غير اسمو وانا واثق من ها الشي
لا تفكري اني مزعوج من ردك ابد ا انا لما عزمة الكل ليردو ع الموضوع لانو اي واحد بيكتب موضوع بيحب يسمع رد الناس وارائون بس الظاهر وصليتك الفكرة غلط ما جاي اتفهمن ع حدا
لانو الكل اهلي وناسي وصدقاء وحباب وشكرا الك لرد كلك زوق ومبسوط كتير انك استخدمتي اسلوبي بالرد منشان تعرفي انو جار القمر الو بصمة بها المنتدى جاي يبني مو جاي يهد . رح ردلك بنفس اسلوبك او اسلوبي الهوارا وقصدي النقد البناء مو التجريح وكلشي بيعرف مين هوي جار بيعرف اني عم احكي بجدوصدق ومالي مصلحة غير مصلحة الموقع .


هور يابي الهوارا جاني الرد بحرارة
وع ها الرد رح برد وبدي شعلها نارا
٭٭٭٭٭٭٭٭٭٭٭٭٭٭٭٭٭٭٭٭٭٭٭٭
ردك يا حلوة منو من الحضارة جايب فنو
الحضارة مو قذف وتجريح الحضارة فيها تغنو
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
عمى النظر يا حلوة بالانسان مش عيب
العيب عمى القلب يلي ما في انسان بيردو
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
نضارات سماك يا نانسي ما رح حط
لانو بشوف بقلبي وشوف القلب مالو حد
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
انا ماني مختار ومحدا وكلني ع ها الدار
ولا ني جاي مقاتل ولاني جاي اخود بتار
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
بدك تعرفي عن جار وشو اصلو رح خبرك
وبلا ما ترمي سهم متلم نصلو
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
اصلي يا حلوة من وادي النصارة ورح خبرك عن الوادي لتعرفي انو جار ابن اصل ومحدا بيحكي ع اصلو

وادي النصارة الكون داخ بترابو
والناس كلها بتحسب حسابو
جبالو قراب للغيمة العلية
اساسات السما الرحمن جابو
ابنو الكرز بنتو مش صبية
ارزة مختيرة تمجد شبابو
بيو العلم ام الابجدية
الحضارة اخدت فلسفتو وكتابو
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

فقر الجيب يا حلوة مش عيب ولا كان بيوم لشرف والاصل يهد بابو
بس فقر العقل يا حلوة هوي العيب وويلو يلي الفقر بيعشعش بدماغو
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
نانسي الغالية هي كانت ردة شعرية علي كتبتيه وبتمنى تاخديها بروح طيبة وشكرا ع محاولتك بالهوارة بس ببيوت الشعر ما في قاتل ومقتول في متعة ولذة و توصيل فكرة
بتمنى شوف محاولاتك وثابري للامام

[شجرة الألب]

[align=center]و أنت يلي بتشور ع الناس هيدا غلط و هيدا تمام
قلي من فضلك مين عينك و حطك مختار للمشورة؟
ما حياتك كلها تخبيص و مليانة عفارة


علشان عمره القرجي ما بيصير بيك و آغا
و لو صار عنده ميت سيارة و عمارة
الأصيل بيضل أصيل
و القرجي بتضلها فيه ليموت ريحة هديك الحارة


اولاً برافو نانسي عالتجربة بسرد الهوارة
تانياً
شقد سمعت وشقد قريت هوارة
بعرفا طول عمرا كلماتا سلسة وحلوة رقيقة
يعني تدخل للقلب بلا استئذان
وبهالهوارة نسيتنا الحضارة
يمكن يكون الموضوع منكي لجار مابعرف ....
بس نصيحة بالهوارة التانية اختاري كلمات انعم
يسلمو نانسي2
تقبلي مروري[/align]

[nancy]

ما عندي هالمرة كلام لرد, معقولة هيك انفهمت هوارتي

ما كملت فرحتي بردك يا ادوناي



Nancy 2

[تيودورا افرام]

[align=center]شكرا لكِ عزيزتي ((نانسي 2))
على سرد الهوارا بطريقتك والكلمات التي انا من وجهة نظري
ليست لائقة ابداً فمثلاكتبتِ

(( أنت يلي بتشور ع الناس هيدا غلط و هيدا تمام
قلي من فضلك مين عينك و حطك مختار للمشورة؟
ما حياتك كلها تخبيص و مليانة عفارة ))

سؤالي لكِ
ماذا تعرفين عن حياته ؟؟؟

((عارفينك منيح, أصلك و فصلك
و ين عشت و بأي حارة ))

هل صحيح تعرفين اصله وفصله وباي حارة عاش؟؟

((حتى لو دار الزمان و حالك صار لقدام و الأصيل رجع لورا
علشان عمره القرجي ما بيصير بيك و آغا
و لو صار عنده ميت سيارة و عمارة
الأصيل بيضل أصيل
و القرجي بتضلها فيه ليموت ريحة هديك الحارة ))

هل كلمة قرجي لائقة بمستوى موقعنا ورواده لاأظن وانا متاكدة بأن
نخبةً لابأس بها لايعرفون ماذا تعني هذه الكلمة

واخيرا عزيزتي نانسي اتمنى ان تتريثي قليلا في المرات القادمة وتفكري
مليا بالكلمات التي تكتبينها لئلا تجرحي مشاعر الناس مع تمنياتي لك بالتوفيق
محبتي ام جوني[/align]

[nancy]

مرحبا يا جماعة الخير



شجرة الألب بعرف ردودك موزونة و راكزة. و مبارحة كنت مصدومة ما قدرت أرد أبدا و للعلم ما قدرت أنام بس شفت مو من الصواب أخلي ردك مفتوح, يعني حطيتي بردك شي خطير كثير لما قلتي: يمكن يكون الموضوع منكي لجار ما بعرف!!!!!!!!!
الله يخليكي أختي هاد أيش كلام؟؟؟؟؟؟ ما بسمح بنووووووووووووب يروح فكر أي قارئ يمين أو شمال و على قولة هوارتي:
الناس تتبلى و تؤل مواوايل من دون
ذمة أو ضمير و لسان بعيد عنك مثل الشرارة!

كل القصة يا اختي: تابعت هوارات الأخ و عجبني نقده للموقع, الأدارة و المشرفين بأسلوب الهوارة, و أنا كمان مو عاجبني وضع الموقع بالفترة الأخيرة, و قلت بنفسي يبين عليو شخص سبور و مودرن و أجا موضوعه عن الشعب الحضاري بمكانه و كان لتقولي هو و أسلوب الهوارة الباب المفتوح الي لحتى قول يلي بنفسي من أجل بناء الموقع العزيز و كمان لحتى شجعوا يكتب أكثر بالمنتدى هو و غيره يلي ردودهم قليلة. بسسسسسسسسسسسسس ولي على حظي الأسود. كثير كثير زعلانة فهم الهوارة هيك بالمقلوب و طلعلي بأصلوا يلي من وادي النصارة و ما بعرف أيش. بس متأكدة ان الرب راح يكشفله نيتي شي لحظة و هي على شعراية و راح يقول: يييييييييييييييي انا كيف رديت على هل البنت الظريفة هيك. الله يسامحك يا جار القمر حاولت نصير أصدقاء هون على صعيد المنتدى لا اكثر و لا أقل!
و عشمي عشششششششمي لو أكتشفت هل الشي ترجع لهل الصفحة و تقول صار سوء فهم.

و بالنسبة لنصيحتك شجرة صحي صارلي 10 سنين طلعت من البلد بس سمعت انا كمان الهوارا و بعرف انها نقد للوضع العام بلكي زمان كان تنتقد الفيزون و التنورة القصيرة بس يا أختي هلأ صار في غير شغلات ننتقدها
و أنا كل يلي عملته أنتقدت الوضع العام يا ريت لو تقريها مرة تانية و تشوفي على كم موضوع انطرحوا بالفترة الأخيرة هون رديت من خلال هوارتي. لا أصل الزلمة و لا فصلو
و صدقي كثثثثثثثثثثثثثثثثثثير فخورة أنا بالشي يلي طلع معي على قدراتي البسيطة مقارنة مع الغير بالنسبة لبنت طلعت من البلد عمرها 15 سنة!
و ياريت يطلع معي غير هوارات لحتى نزلها و ما راح أكتبها الا بطريقتي و أسلوبي. عفوا ما راح غير حالي!

ليش ما سئلتن حالكن يا ترى أدوناي ليش هيك كثير عجبتو و ما تحامل علي مثلكن
بس بيضلوا الناس أذواق مختلفة و على قولة حكمة تعلمتها من وردة: أرضاء الناس كلها غاية لا تدرك!

بس طلعت معي هاي الكلمات كمان على دوخة راسي من هل الموضوع بهديها الك و لجار القمر
و انششششششاللله تفهموها غلط يا جماعة هل المرة

على هور يا بو الهوارا
يا عمي هدول الأسبان
صايرين بمنتهى الخطارة
أوعى حدى يقرب منهم
أوعى حدى يحكي معهم
أحسن ما تجيك براسك
هلأ شي حجرة
آخ يا راسي هواااااااارة ( هاي هوارة جزراوية يعني آخ يا راسي بيوجعني)
بس يلا بيطلعهم, حلوين
ربحوا بجدارة المبارة

كاااااااااااااانت مزحة ها

Nancy 2

[شجرة الألب]

[align=center]عزيزتي نانسي 2 كويس اليوم عندكِ رد مو متل امبارح
بالنسبة ( يمكن يكون الموضوع منكي لجار ما بعرف!!!!!!!!! )
وين الخطورة قصدي ان الرد كان على موضوع جار القمر تبع الحضارة
الظاهر مو بس نحنا نفهم غلط
والهوارة انفهمت كتير كويس ومتل ماكتبتيا ويلي قصدتي فيا
بس يلي لاحظته من رد العزيزة ام جوني كمان
يعني قصدنا واحد هو:الكلمات المختارة عزيزتي
ماحدا منعكي تنتقدي او تكتبي هوارة
بس بصراحة هالكلمات (تخبص وعفارة والقرجي والخ.. )
حسيت انها غير لائقة بصبية مهضومة متلكي وظريفة متل ماقلتي انتي وللأسف ماسمحتلي فرصة اتعرف عليكِ
ولا هي لائقة بالمنتدى لأن في 4 ردود 1 فهمها صح و3 فهموها غلط في غلط بالموضوع
انتِ أنتقدتِ اسمحيلي انتقد انا كمان بطريقتي لأني ماراح ارد بهوارة كوني مابعرف
ونتمنى نسمع من بعضنا النقد البناء ولانفهمو تجريح
لأن اتوقع الكل عم نسعى لرقي الموقع
والوضع العام يلي عم نمر فيه أكيد فترة وتعدي ولانكبر الموضوع كتير
كل ماهناك بلش الصيف والعالم انشغلت أكتربالطلعة والسفر وهالشي عادي كتير
تقبلي توضيحي
مشكورة نانسي2
[/align]

[تيودورا افرام]

[align=center]اهلا وسهلا بك مرة ثانية عزيزتي نانسي
لو تمعنتي برد جار القمر عليكي كان عرفتي انو جرحتي مشاعرو
بكلماتكي
(( ما حياتك كلها تخبيص و مليانة عفارة ))
((عارفينك منيح, أصلك و فصلك و ين عشت و بأي حارة ))
((علشان عمره القرجي ما بيصير بيك و آغا ))
((و القرجي بتضلها فيه ليموت ريحة هديك الحارة ))

ياترى لو انتي اجو هالكلمات رد على موضوع الكي رح تقبلي فيا ((مااعتقد))

وشعار بنتي نانسي وردة الجزيرة يلي هوي ارضاء الناس غاية لاتدرك
هوي شعاري انا كمان بس لازم نعمل حساب لكلامنا مع العالم
لانو عندن مشاعر واحاسيس متلنا متلن
وانا كوني مشرفة بهالموقع فمن واجبي اصحح الخطأ واحذف الكلمات
الغير لائقة وكون وضع المنتدى ماعم يعجبكي فالدنية صيف والعالم بإجازات
والعالم الموجودين هاي قدرتن على العطاء وبالنسبة لقدراتكي ومواهبكي
فالكتابة الله يعطيكي العافية ونحنة مانا ضدكي بس تاكدي لما يكون في كلمات
تزعج الرواد وتمس مشاعرن رح تنحذف فورا ان كنتي انتي او غيركي
تمنياتي لكِ باوقات سعيدة
محبتي ام جوني[/align]

[Abo George]

يسعد صباحكن ومساكن
في بعض الاحيان هناك مواضيع وكلمات نستطيع ان نفهمها بعدة معاني وأتجاهات ويبقى تأثرنا فيها حسب الشخص الذي كتبها وحسب معرفتنا به وكيفية تفكيره ونواياه كما يقولون.
وكل منا له أسلوبه وطبيعته بالتعبير قد يحتوي هذا التعبير كلمات لا تستحبونها كما ذكرتم في ردودكم على نانسي.

أكيد أنا قرأت الهواراا ورأيت الكلمات والجمل ولكن لم أحملها ما تحمله من معنى ولم يذهب تفكيري بعيداً
بل أخذتها ببساطتها والسبب انني التقيت عددة مرات مع نانسي من خلال حفلات جزيرة كوم وأعرف يقيناً أنها لم تقصد أبداً ما وصل بكم التفكير به بل كتبت الموضوع ببساطة وكما يقولون بقلب ابيض ولم تحسب الحسابات التي حسبتموها
ولكنها اوصلت أفكارها باسلوب قد يكون غير مرغوب به وفيه بعض الكلمات الغير مستحبة
أنشالله تتعرفوا عن قريب على نانسي ورح تفهموا اكثر
تحياتي لكم جميعاً

[abo alzoz]

[align=center]عزيزتي نانسي2
رحم الله أمرءٍ عرف قدر نفسه ووقف عنده
تقبلي تحياتي
ابو الزوز[/align]

[جار القمر]

يسعد اوقات الكل انشالله تكونو بخير وبصحة جيدة
شجرة ام جوني ادوناي شكرا كتير لردودكون ولجهودكون بالرقي بالمنتدى نحو الافضل وانشالله يوصل لاعلى المراكز .

اخت نانسي 2 الهواره هيي اغنية تراثية انوجدت لتوصل فكرة او نقد معين لناس
بتتميز بكلماتها الحلوة وروح الدعابة والمزحة الخفيفة اللطيفة .
طبعا انا ماني شاعر انا كان الي محاولة انو دخل جو مرح ع المنتدى ونقد يمكن اوقات تقيل يمكن اوقات مقبول خفيف حسب الوضع . ولا مرة انزعجت انو حذفولي موضوع وحكيت كتير مع المشرفين المسؤولين عن المنتدى ا نو اي موضوع بنزلو وما بيناسب المنتدى معليش احذفو كلنا بشر وكلنا منغلط وكل واحد بيشوف الموضوع من وجهة نظر معينة ومختلفة

ها الموقع عزيز كتير ع قلبي واكيدة يلي بيعرفني مليح بيعرف انو ما عم جامل
انا كتبتلك بردي اني من وادي النصارة بس منشان يكون عندك فكرة انا من وين مو بلا اصل

طبعا هوارتك ما نفهمت غلط انفهمت صح والكل فهمها صح

انا ماني مقل بكتاباتي بس نانسي انا ما بحب الحشو بالمنتدى يعني فيني نزل مية موضوع فاضي بيومين ما تفهمي كلامي اني بقصد حدا ابدا واخر فترة عملت نشاط وحركشت الناس متل ما بيقولو بس لتحريك المنتدى طبعا والمشرفين ما عم يقصرو لادراكي التام انو هي فترة صيف والناس مو فاضية لنحافظ ع مستوى معين من النشاط بالمنتدى .
الكل نانسي فهمو الموضوع صح واكيدة اي واحد بدو يقرا الموضوع رح يفهم كلماتو لانو ما مكتوبة بطلاسم بالنسبة لردك ع شجرة انو في شي بينك وبين جار القمر ما قصدها شي قصدها انو ممكن مشكلة معينة سوء تفاهم لا اكتر ولا اقل ما تكبريها كتير هيك كان قصدها
ومدام ام جوني كمان فهمتيها صح واكيدة الكل هلق ممكن يكون عندك مشكلة بالتعبير لانو الك زمان برا ممكن يكون مبرر

بس نانسي يلي عم يقلك الهوارة حلوة اكيدة عم يجاملك لانو ما فيها اي ترابط وطبعا انا ماني احسن منك بالهوارة يعني كمان هوارتي مانها كتير مليحة بس كانت محاولة لا اكتر ولا اقل

مقالتك كانت كتير موجهة نانسي ضدي كشخص مو كتصرف شو بدك باصلي وفصلي كلنا ابناء تسعة وولاد ادم وحوا ما تحكمي ع الشخص الا بعد ما تعرفيه شوفي مين هوي جار وبعدين من حقك تنقدي تجرحي تسبي ع كيفك هي حرية شخصية وانا بحترم حرية اي شخص

بس المنتدى ما هوي مكان لنسب ع بعض منتدى الجزيرة ارقى من هيك بكتير
وما تفكري اني بزعل منك نانسي انك كتبتي هيك بس مجرد كانت مفاجئة الي
بعتقد ما بحياتي ضايقة حدا بها الموقع وما في اي شي شخصي بيني وبين اي شخص وما بحياتي شعرت حالي غريب بيناتكون لانو كلنا اخوة بالمسيح وها الموقع رح يضل عزيز ع قلبي وشو بقدر قدم ع قد امكانياتي انا جاهز قولا وفعلا

اخر شي نانسي رح قلك كلمة حق انتي غلطتي بحقي كانسان ومابدي منك شي بدي قلك بس

اللله يسامحك والله يوفقك بحياتك

[nancy]

يا اخي عنجد ما بعرف أيش أقول و ما بعرف كيف راح أقنعك. بس الحمدالله عندي ثقة بالرب لابد أنه يكشف نيتي شي يوم.

بس بجد أذا أهلي سمعوا هاد الموضوع و خصوصا اخي راح يدقني قتلة ما صارت مع أنه ما بيوم ضربني:lol:

و بلكي يمنع عني الأنترنيت . ما حدى يخبرهم ها , خلوها هون بيناتنا سر

قال أنا عم سب الناس هون. كانت ساعة باطلة و محولة يوم قررت أكتب هل الهوارة. سببتلي عقدة نفسية لازم أروح اتعالج عند طبيب نفسي.

طيب يا جماعة أكيد هلأ في ناس مستمتعة بهاد الموضوع و تبتسم ابتسامات صفراء عريضة و هي تقرأ الردود

أنا آآآآآآسسسسسسسسسسسسسسفة كثير يا جار القمر و يلا يابو أنا ذوقي قرر.... قصدي سوقي بالكتابة. مبسوط؟


Nancy 2

[salwa]

[align=center]مرحبا للكل
صراحة الأشخاص الذين كتبو على هذه الصفحة
أحترم قلمهم ويعجبني ايضآ
عندما قرأت هوارة نانسي2
صراحة مضمون الهوارة كان مفاجأة بالنسبة لي
وتوقعت أن تمحى ( يعني تنسف من أساسها )
ولكن المفاجأة كانت عندما شاهدت التعليقات
سؤالي: انتم كمشرفين شاهدتم أن هوارة نانسي2
هي تجريح لجار القمر فلماذا لم تمحى في لحظتها
هذا السؤال يراودني ولم أجد له جواب
فأتمنى أن أتلقى جوابه
وأحب أن اقول للكل هنا أنتم تعرفون جار فقط من خلال اسمه أو صوته
ولكني اعرف جار جيدا هوى من أصدق الناس
وعندما يكتب يكتب من حبه وغيرته على هذا الموقع
حبه من القلب وأنا أعرف عندما بدأ يكتب الهوارة
كان قصدة خيرآ للموقع ومن شدة حبه للناس هنا
وأحب أن استغل الفرصة
مثلما يقال سيرة وانفتحت
قبل هوارة نانسي2 بعدة أيام
كتبت الهوارة ولكني تفاجأت أن الهوارة انمحت او انسفت من أساسها
مع أني في الهوارة كانت نقد بشكل عام وطبعا كان القصد منها خيرا لهذا الموقع الذي أحبه وأحترمه
سؤالي: أين الغلط في الهوارة لكي تنسف
أرجو أن القى جواب على سؤالي هذا ايضا
شكرا لكم
تقبلو مروري
سلوى[/align]

[بسيم لحدو]

مساء الخير للجميع
سلامة سلوى شتقنالك بعد زمان والله انشالله تكوني بخير

بالنسبة للهورا تم التعديل من قبل المشرفين
وانا شخصياً كنت بدي احذفها ولكن
بعد ما حكيت مع الاخ جار القمر وقالي اتركها هوي الي بدا بالموضوع وهوي كمان راح يرد
اتمنى اذا بتكملو بهل موضوع ياريت يكون الكلام خارج التجريح او ذكر الاسماء لان عم ينفهم الموضوع غلط
او سوء فهم
اتمنى اخت سلوى وصلك الجواب
تحياتي للجميع