• ×

قائمة

اذا بدك شي نحنا هون ها...بقلم آرا سوفاليان

زيادة حجم الخط مسح إنقاص حجم الخط
جزيرة .كوم 
رايحين ندفع فاتورة الهاتف فلقينا الـ 3 صناديق ما عليهون حدا فقلنا يا سلام مندفع بدقيقة وحدة ومنضل ما شيين... ولكن يا فرحة ما تمّت ... 3 صناديق كل صندوق على (حدة) و3 فتحات على شكل نصف دائرة... في الزجاج المضاد للرصاص وسيكيوريتي و مفييم وعلى كيفك وما فيهون حدا بمعنى 3 موظفين صندوق فص ملح وداب هربو التلاته عندهون تمساية صباحية علـ صبحية...وكلو تمام وكلو ماشي بس ما في موظفين...الحل البديل والوحيد هو الدفع بنظام البطاقات...وذهبنا الى كوة الدفع بالبطاقات فقالت لنا الفتاة وهي موجودة دوماً ولا تغيب لأنها تعمل في شركة تعود للقطاع الخاص وقلنا لها نريد ان ندفع فاتورة الهاتف...فجاء شيخ وقال لي لا تدفع هنا لأنك ستدفع ثمن البطاقات البلاستيكية لتضاف الى فاتورتك يعني متفقين ( دافنين الشيخ زنكي سوا ) ... بيغيبوا موظفي مصلحة الهاتف قصداً وانت مضطر فتدفع أكثر ويتقاسمون الفرق ... قلت للشيخ (ما وقفت عند هون يا شيخ لأنو المصفاية يلي بمليون بخش ما بيعيبها بخش زيادة ) وابتسمت الفتاة ابتسامة وفتحت فاها فبانت الرحى الثالثة ـ ضرس العقل ـ وقالت بغنة أعجمية يا ريت فيني اخدمكون سألتها لماذا ايتها الجميلة ...قالت: الشبكة معطلة هاهاهاهاهاهاهاها
وجاءت سيدة وقالت إذا كانت الشبكة معطلة فلماذا تقطعون الخط...قالت لها الفتاة ولماذا تحضرين حضرتك في آخر لحظة؟ قالت السيدة...الله وكيلك هاي رابع مرة على مدى اسبوع والجواب نفسو الشبكة معطلة ...وهيك لحتى قطعتو الهاتف وانا مضطره عليه كتير جوزي وولادي برات البلد...فوالله هي آخر درجة من قلة الأخلاق انو تقطعو الهاتف مع انو الشبكة عندكون هي السبب وين نروح ندفع بالمريخ!!!...الشبكة خلقت للبلاد المتحضرة مو لهون...كانّو مالي شغلة غير آخد أذن واجي لأدفع الفاتورة ولاقي الشبكة معطلة ...لعمى انتو بدون دربكة كنتوا عم ترقصوا سامبا فكيف مع ألف دربكّة زائد قطع الكهرباء...الله يعينكون علينا!!!؟؟؟
يالله نمشي من هون قعدتنا ما الها فائدة... ممكن يقطعوا التلفون اذا لسا ما قطعوه...خليهون يقطعوه ما منو فائدة وما بيجينا منو غير أخبار الشؤم خليهون يقطعو الله لا يردو.
ألو...ألو ...وطّي صوت المسجلة حتى اسمعك... دقيقة خلليني صف عل يمين خير شو بدك؟...وينك بابا؟...بالصين...جد وينك بدي قللك على شي ضروري؟ شو هوي الضروري نزلت مدقة هاون دقتلنا التومات يللي عل بلكون؟...لا لا كنت بدي وصيك على شغلة مهمة...شو هيي؟... اذا مرقت من ساحة الحلوين فوت على محل الدلافين جبلنا كيلو نابلسية...طيب طيب فكرت في شي ضروري.
مرحباً......مرحبا....يا زلمة شو بتصرف بنزين اذا رديت علينا ؟؟؟ واحد عم يقلك مرحبا قللو أهلين...والله كنت شارد أمرني...كيلو نابلسية بدون قطر براميل... ـ 350 ليرة ...تفضل
لعمى مين هل بغل يلي عم يدفش؟؟؟
ـ شو يا معلم ما حليتولنا ضرسنا اليوم؟
ـ هشام شوف شوبدو
ـ نحنا 3 حطلنا 3 صحون بس من النص مو من الطرف...وكترلنا القطر
ـ على راسي بس نمشّي الشب
ـ لا الله يرضى عليك ما فيني اتأخر علشباب
وجاء شاب من الشباب وقللو للشب المشبشب ...عملهون 7 لأنو اجو جماعة ابو مرهف
ـ عملهون سبعة يا معلم اجو جماعة ابو مرهف
نظر الأجير الى جهة الصندوق حيث يجلس صاحب المحل وفي عينيه سؤال مؤلف من حرفين...شو...وجاءه الجواب على شكل اربع احرف شو شو ...عطيه.
وخرج الأولاني يحمل جزء من الصحون والثاني يحمل الباقي مع الشوك البلاستيكية...نظر الاولاني الى صاحب المحل وقال له...اذا بدكون شيء نحن هون ها...وذهب مع الريح...وقال صاحب المحل انشاء الله السم الهاري وقت بدكون تكتبونا مخالفة بتكتبوها وما بتعرفوا الله...قلتلو: ليش لتعطيهون؟ جاوبني: خليها لله والله اذا ما عطيتهون ما بخلو زبون ولا زبونة توقف سيارتها ادام المحل...والله بيقطعوا رزقتنا.
وهكذا فلقد جلى الاتراك عن بلاد الشام في العام 1918 وجلى الفرنسيون عن سوريا في العام 1946 وظل كل شيء على حاله...ولم يتغير شيء... ولا زالت السلبطة والهف واللهف ديدن البلد رغم الظروف الحالية التي تجفف دموع التماسيح...وهذا يذكرني بمقطع من مسرحية غربة يقول فيه أحد اللاعبين للاعب مقابل يبيض الوطنيات (حط الجوكر من ايدك) صحن النابلسية بسبعين ليرة والله ما باخدو صلبطة حتى ولو بدي موت احتراماً للبدلة يلي لابسها أو احتراماً للناس يللي كرامتهون ما بتسمح يقولوا انهن صرلهون اسبوع بدون أكل.
آرا سوفاليان
كاتب انساني وباحث في الشأن الارمني
الأحد 20 01 2013
[email protected]




بواسطة : Administrator
 0  0  559
التعليقات ( 0 )

جميع الأوقات بتوقيت جرينتش +2 ساعات. الوقت الآن هو 10:25 الأحد 15 سبتمبر 2019.