• ×

قائمة

المصاحبة !!!

زيادة حجم الخط مسح إنقاص حجم الخط
Abouna Theodoros Daoud شو الحلوين؟ مصاحْبين؟ و بتحبو بعض ؟
بتحبو بعض وبدكن تتزوجو يعني ؟
أكيد ؟
طيب ليه عم تؤذو بعض ؟ هيك بكون الحب؟ سهر وشرب ولبس وجنون ودخان وكلام ما بليق لا بأولاد الرب ولا حتى بعشاق؟
بتحبو بعض؟ لا تزرعوا بذار فرح علاقتكم في العالم، العالم أرضو بور ومياهه مسممّة. لا تبنوا علاقة على عواطف وأغاني فاضية وتقلدوا الأفلام والمجتمع المريض والفنانين الفارغين ، هيدا كلو باطل وكذب وما بدوم.
بتحبو بعض ؟ لاقوا أب روحي أمين تقليدي يرعاكم ويرشدكم بنور المسيح وتضلوا أنتو متل الفرشات حولو.
إمسكوا إيدين بعضكم عالقليلة مرة بالأسبوع وروحوا على شي دير بعيد او كنيسة مهملة، اقعدو وصلوا وخلو الرب ثالثكم. ازرعوا بأرضو واشربو من مياه بئره الحيّة. اقعدو اقرأوا بالأنجيل شوي وصلوا شوي وامسكو إيدين بعض وامشوا بالطبيعة وحسوا حضور الله.
يا شباب، يلي بيبني علاقة على شهوة رح تنتهي شهوة. قد ما تكونوا حلوين و Cute الحياة رح ترمي قدامكم أشخاص أكثر جمال وأكتر cute والشهوة بتخرب الشهوة. خلو الحب يذوب بالمحبة وإلا علاقتكم رح بتضل شهوة. جيبوا المسيح على علاقتكم لتتبارك وتختبرو الطهارة واذا توسختو قوموا وارجعوا للرب، هو شايف جهادكم وتعبكم وضعفكم. عيشوا علاقة تكونوا فخورين فيها تحكو عنا لأولادكم بالمستقبل وما تخجّلكم بالقداس وتمنعكم عن المناولة.
كلو بيجي وقتو، في وقت للجنس وفِي وقت للتعب وفِي وقت للجد. تمتعوا بفرح شبابكم ببراءة.
لا تحبوا بعضكم بالجسد قبل ما تحبوا بعضكم بالروح وتعرفوا على إنسانكم الداخلي بدون ضغوط.
ما تفكري اذا عطيتيه كل شي بيطلب رح تربحي، هو بعد ما بيعرف شو بدو وعم يتعلم فيك الرجولية والذكورة ويمكن يغير رأيو بس يعرف شو بدو وما تكوني إنت وهيك بتكوني خسرت كتير وانجرحت كتير.
خلي يكون إلك رأي بالعلاقة. انت مش تابع. انت بنت الرب.

وانت يا طيب، الرجولية يا إبني احترام ومخافة الله. من هلق كون رجال وشهم واحميها، بس اول شي من ضعفك ومنك وبس الرب يشوف نيتك وجهادك بخليها تشوفك رجّال كل العمر وما حدا شي يوم جغل اكتر منك او احلى منك أو أغنى منك او متعلم اكتر منك بيقدر ياخدها منك. اذا المسيح ما جمعكم ما في شي بيجمعكم .
حبوا بعضكم بالمحبة أكتر من الحب وتذكروا أنكم انتو الاثنين ملك المسيح وأجسادكم هي هيكل الروح القدس وأنكم نورو بين جيلكم وفِي العالم.
بتحبو بعض ؟
حبو بعضكم صح … بالمسيح وبالنعمة وبالحق وإلا رح تجّرحوا بعضكم وتجّرحوا صورة الكنيسة وقلب الرب.
وأنتو الأهل ، خبروا والدكم هالحكي بمحبة وخلوهم يقروا هالمكتوب.
الله يرحمنا جميعاً
الأب ثاوذورس داود
@Abouna777
بواسطة : ADONAI
 0  0  163
التعليقات ( 0 )

جميع الأوقات بتوقيت جرينتش +2 ساعات. الوقت الآن هو 09:03 السبت 19 أكتوبر 2019.