• ×

قائمة

أهل الرمـــل....جوزيف أبي ضاهر

زيادة حجم الخط مسح إنقاص حجم الخط
 

قالو الشرق
بردان
وعّو النار
بدّو الرمل يدفا
ويدفا القصر
وقبل العصر
نار الشرق
زنّار
لفّ المدينه
واحْترق قوس النصر.

2

بـ وّج الهوا وقفو
وكانو مصدّقين
إنّو من سنين
جسم الشرق بردان
ومتكي
ع اللَّهَب
ـ والنّاس؟
النّاس
سمّوهن حطب
بيزقّفو
ومكوّمين.

3

أهل الرمل بـ الشرق
بيحبّو الزَقيف
بيغفو
ع الزَقيف
بيوعو
ع الزَقيف
بيزقّفو
بيزّقفو
وبيركعو
وما عندن رغيف.

4

أهل الرمل
نطرو الوقت
والوقت؟
شو غدّار
دارتْ
طواحين الهوا
ما عاد عرفو النّوم
وبعدهن
لـ اليوم
عم يسألو
كلّن سوا
كيف الدني وقعت
وصارو غبار؟

5

التَفتو
وشافو الشرق
سرّب
ع لمع البرق
ونايم
بـ خيمة عنكبوت
الرمل؟
منّو بيوت
بيلمع
ومش ياقوت
ما الرمل ميّت
من قبل
ما يموت.

6

أهل الرمل
عينن علينا من زمان
مرّه
بيهدونا حكي
ومرّه
بيطقّو من البكي
علينا
وبيحاربو بعضن
بـ إيدينا
وآخ...
بيقولو
احترق لبنان.

7

عينن بتلمع
ومنن قاشعين
متل الكأنن
رايحين
ومش راجعين
من حلم أسود
ندهن
وغفيو
وبعدن
غافيين.

8

أهل الرمل
غفيو
احترقو
بـ الشمس
وصارو يطفّو
ويمسحو عيون التراب
ندمو؟
ويا حيفن
زيّنو ريش الغراب
ولبسو عبايه منتّفه
بـ يوم العرس.

9

بـ السيف
رسمو خارطة هـ الشرق
لا حبرْ
لا فِكرْ
ردّو البحر
كل المراكب شعر
الشعر بدّو حرق
الشعر ثوره
ونار
بتوعّي الغضب
بتوقّع التيجان عن روس العرب
وبينمحى
الكان انكتب
ولما انكتب.

10

عملو ملوك
ديوك
مصْطبة الوهم
بـ الخوف
بـ التهديد
جوّات العتم
ولمّا النجم
بشّر يفلّ الليل
دولاب صار التاج
لـ «هودج»
ما عندو خيل.

11

خافو ولمّو بعضهن
جمعو دهب
جمعو حكي
جمعو نفط كل العرب
تـ يشترو
عنقود
من كرم العنب
تاري الدهب
يا خْطي
داب
ووقع بـ الميّ
رجعو
ايديهن فاضيي
تنقط تعب.

12

... وغمرتن بيروت
بيروت
ياما عطتيتن بيروت
كل المدى
وفتحت القلب بيوت
خَبْزتْ الحب
وطَعمتن
قَطفتْ الشمس
وهديتن
وبـ الليل
وحدا الـ خبّتن
شلحت تيابا
وغَطّتن
ولمّا العتم سرّب
قوّصو عليها
قوّصو
تـ تموت.

13

معوَدي بيروت
من الحزن ترجع
ولا قلبها يشكي
ولا عينها تدمع
رَدّو ايديهن
واستحى المدفع
لبست العرس
وطلعت تغنّي
وضجّ صوتا
وهـ الدني تسمع.

14

نارن ع كفّ الرمل
بقيت
والعه
قاشعه وجّن
وحَكين سامعه
وبعدن بيحكو
وبعد
رح يبرا الكلام
هجّ اليمام
وزتّها مكاتيبهن
كل حبرا دمّ
وينوّي
السلام؟

15

خبزن مقدّد
ريحتو؟
ريحة جرح
لا خميري
لا ملح
الجوع ردّو
يابس
وأسود.

16

ركضو
إجو لعنّا
سرقو الخبز
منّا
وتركو
رغيف مفتتي
يا لهفة الجوعان
صْبَرنا
نْطَرنا
تغيّر العدّان
جنّ الهوا
وتفرّفطو
وراق الشتي.

17

أهل الرمل
ما تسألن:
كيف عايشين؟
هنّ؟
منّن عايشن
جوّات حالن
قاعدين
عم ينطرو عتق الزمن
ويحيّكو
تياب العفن.

18

أهل الرمل
بيضيّفو وجّ العَتم
قهوه
وشو بكيت ع الفَحم
ما بيطربن غير الرباب
يا وتر مشدود
متل الرمح
الخيمه
جرح
نشرو ع جسما تياب
سودا بـ لون قلوبهن
بيكفّرو البيلومهن
وبيسبقو
غدر الدياب.

19

أهل الرمل
بيخيّطو رموش البنات
وبيمنعوهن
يشتهو
السكّر نبات
ما في فرس تطلع بلا خيّال
هيّو المضارب
كلّها لـ الليل
وَلْفو ع الخيل
ريحة غزو
عدّو السيوف
رجال.

20

أهل الرمل صَحرا
عشبها؟
عشب الحكي
ومفرّخ بـ صَدرا
ونبعها؟
ميّ البكي
وع الرمل
ما في فيّ
ما بينجمع رمل وسَجر
كل السَجر
متل البشر
تيعيش
بدّو ميّ.

21

الـ ميّ
أوّل حرف
والأبجديّه كتاب
غُطّن صبيعك بـ الحبر
أخضر
اندهلو الربيع
بتلمحو
جايي الشعر
وموصّلو
ع الباب.

22

لمحو الشعر
بـ كرومنا
عناقيد
حَبْحبو حروف الكلام
صرّخو لـ رجالهن
جيبو بواريد
بتخوّف الأحلام
بتتغيّر الايام
وقبل الفجر
ما يوصل لعندن
دبّحو فروخ الحمام.

23

... وبقيو صبيعن
ع الحجر
ما بينمحو
جرح انحَفر
قتلو الضحيّه
مرّتين
ألف مرّه
مرّتين
وغسّلو دَيهن
سابقو جْرَيْهن
وإلهن
ما رفّت عين.

24

... ومرّات
هنّي وراكضين
يفرفطو الياسمين
ويزتّو العطر
حقد
وقهر
ع ترابنا
ويغافلن
ويفرّخ بساتين.

25

شو كبير هـ العالم
وحِلمهن
شو زغير
بيقتلو فراشه
ـ بيقتلوها ليش؟
... عم بتطير!

26

بيتغيّرو؟
ما تنطرن
بكّير
يمكن بعد بيختيرو
هنّي وعم يهجّو:
ـ « ب ي تّ ح رّ رو»
وما بيكسرو
بواب الحديد بـ قلبهن
وقبلهن
عصفور
نقود بواب القفص
تـ يكسرو
ويطير.

27

يا ريت فينا
نحسب النتفه
من الفرح
واللي انجرح
ما نتركو
عم تاكلو
اللهفه
أهل الرمل
ودّو الضيوف
سيوف
السيف ما بيحسّ
السيف ما بيشوف.

28

أهل الغرب؟
حطّو بلادي بـ المزاد
وأهل الرمل
بـ المال كل شي بيشترو
اتْدّفو ع نيران الكتب
سرقو العياد
واللي بيسرق
مين قادر ينطرو.

29

خيّطو لـ بلادنا
وراق السَجر
الصفرا
الوقعت ع الحجر
وع الشط وقفو
يعيّطو لـ النّاس
وزّعو لـ ترابنا
تذاكر سَفر.

30

خنقو الفجر
وصوات لـ عصافير
حرقو اليبس
تَ يحرقو الأخضر
في ناس
هجمو
رمّدو بكّير
وفي ناس
ضلّو
يبوّسو الخنجر.

31

الحزن
بلّش يترك الجرح العتيق
لبست الصوره
شوق منديل السفر
ومشيت اللهفه
وخلفها
تمشي الطريق
بتوصل
وقبل الضوّ
بتودّي خبر.

32

قدّنا؟
ما في حدا
اشتاق
ونَطَر
تنكسر هـ العاصفه
ويهدا الغبار
وترجع الشمس
اللابسي عزّ النهار
ومن خلف غيمه
يغمز بـ عينو
القمر.

33

مرقت علينا سنين
سودا
مشحبرا
وع كل باب
غراب
الحرب إلها نياب
عضت ايدينا
والقلم
والمحبره.

34

الفجر راجع
فوق
بيتو قبالنا
بيطلّ يتغاوى
ع مدّ تلالنا
بعدا الخميره
فوق عتبات البيوت
وهـ الغيمة السودا
المارقه
بتموت
بـ عين السما
منلمح خيال
جبالنا.

35

بعدو القمر عشقان
خيمه بـ الكروم
والكروم؟
سلال
ملياني نجوم
وبعدو الدوري
عم بيسرق
ع السكتْ
بيطنّش الناطور
ما عندو وقتْ
عينو ع نجمه
نايمه بـ عرزالنا.

36

وع البيادر
بعدنا
منترك قمح
لـ النمل
لـ الشمس
لـ طيور الصبح
العزّ عين بوابنا
والقلوب بيوت
وتحت عتبة بابنا
بتنحني
تَ تفوت.

37

بعد عنّا سهول
ملفى الطير
بـ جسمْ الأرض
ايدين عم تزرع
رمان ورياحين
ونحل
ما بيهدا بـ البساتين
شفافو عسل
يا ربّ
زيد الخير.

38

بيوتنا بعدا
وبعدا مطرحا
صبّحا بـ دربك
ولنّو بـ الوما
شبابيكها قلبك
قرّب
وافتحا
قدّ بوسه
بينها وبين السما.

39

بكرا البنفسج
رحْ يفرّخ بـ الصبيع
والسَجر
رح يشلح تياب الحداد
ومن قبل ما يشفّق
ويندهنا الربيع
بتكون لبست أرضنا
تيابا الجداد.

40

بعد الشتي
بدّو الصحو يرجع
ويرجع يصيّف
فوق
ع روس الجبال
الفجر
يلمح طلتو
يطلع
لابس اللهفه
وفوق ايدو شال.

41

رجعت عياد الصيف
زوغات حساسين
وراجعه
كرمالنا
يا جراس تنده
لـ الصلاه
وعياد
كلا لـ الحلا
وحلوين
وساحات بياعين
وولاد ولعب
رقص
وغناني
ومنجيرة قصب
وتعنّ إيام الزَهو
ع بالنا.

42

بعدا المواسم خير
دقّو ع الخشب
الفلاّح
عم بينفّض تياب التعب
وبْ البيت
عنّا قمح
عنّا نبيد
ومزهريّة ورد
غمر الايد.

43

بعدو حرير بلادنا
لِبْس الزَّهر
وغبرة
تراب صخورنا
كحل النَّهر
بعدو الفكر بحّارنا
صوب المدى
وفتحة كتاب الشعر
أوسَع
من بحر.

dai3tna.com
بواسطة : Administrator
 0  0  624
التعليقات ( 0 )

جميع الأوقات بتوقيت جرينتش +2 ساعات. الوقت الآن هو 09:26 الأحد 15 سبتمبر 2019.